Rannveig er farin að blogga !

Sjáið hvað Lata Gréta aðhefst svona hversdags.

Ný amma í hópnum !

Þann 23. september fékk ein af stofnfélögunum nýjan titil - hún er orðin AMMA !!

Til hamingju með dótturdótturina, Nína !

Bestu kveðjur til nýbakaðra foreldra og auðvitað þeirrar litlu líka.

Teljari eða ekki teljari !

Rannveig er að heimta teljara á síðuna. Ég veit svei mér ekki - kannski ef ég fæ nógu margar áskoranir í kommentakerfinu - mig langar líka að vita hverjir koma hér við og lesa það sem hér er skrifað.

Eftir lúðukvöld !

Sælar gleðinnar konur og takk kærlega fyrir skemmtilegt kvöld.
Tek undir þau orð Tótu að Ásta í Þingmúla átti bestu sögu kvöldsins. Þetta var alveg eðal kvöld og sýnir enn og sannar hvað þessi félagsskapur er frábær. Anna Guðný var með eina góða sögu sem hún kom ekki að sökum hlédrægni eða mikils orðaglaums.
Eins og konur vita er Anna Guðný að vinna á karlavinnustað í tengslum við virkjanaframkvæmdirnar. Eins og gjarnan er á föstudögum spyrja vinnufélaga hvern annan hvað eigi að gera um helgina. Anna Guðný sagði að sér væri boðið
á fund hjá Gleðikvennafélaginu. Þá lifnaði nú yfir nokkrum eyrum á svæðinu, einhver brosti hringinn og segir
"Hvað ertu að segja, gleðikvennafélag? Hvað gerir það félag?"
"Nú þetta eru konur sem hittast til að gleðjast saman."
"Nei, æi, láttu ekki svona, ekki vera að snúa út úr, hvað gera þær????"

Þetta sýnir að við verðum að lesa bréfið okkar oftar og við fleiri tækifæri.
Sumir eiginmenn þykjast vera stiltir og prúðir heima þegar konurnar þeirra bregða undir sig betri fætinum. Þannig var um einn eiginmanninn í gær, hann hringdi og lét kalla spúsu sína upp á fundinum og fékk hana í símann. Hann hafði smurt hunangi í hálsinn á sér og spurði hvar hann finndi nú heimilisbiblínuna, hún væri ekki á sínum stað og úr því hann væri einn heima vildi hann kíkja í þá góðu bók. Þessu trúði frúin. Ég þori að veðja að hann hefur verið á öldurhúsi og hefur bara verið að villa á sér heimildir. Ég meina, ágætt að kíkja í biblíuna, en það var nú laugardagskvöld.
Kolgríma sem hefur verið veik og lystarlaus undanfarna daga hresstist að sjálfsögðu við að fá svona skemmtilega gesti. Hún þarf sko ekki á neinni sálgæslu að halda umfram það sem henni er klappað og hún knúsuð hér á
heimilinu. Hún hafði ekki borðað neitt í tvo daga þegar henni áskotnaðist lax á diskinn sinn í gær. Þá hresstist hún til muna og í morgun gæddi hún sér á hráum laxi. Ég heyrði ekki betur en að hún tautaði út um munnvikið að
miklar heiðurskonur hefðu þetta nú verið sem eftirlétu henni allt þetta góðgæti.
En þá er bara að taka ákvarðanir um framhaldið og fela ferðanefnd að skipuleggja ferð til höfuðborgarinnar, ákveða dagsetningu og hafa samband við Reykjavíkurdeild Gleðikvennafélags Vallahrepps.

Rannveig

Vel heppnað lúðukvöld !

Lúðukvöldið var í alla staði vel heppnað. Skemmtilegar konur, skemmtilegar umræður um ketti, börn, karlmenn, bækur, hrotur og svo ótal margt fleira, góður matur og drykkur en fyrst og fremst góður félagsskapur.

Ásta í Þingmúla sagði örugglega brandara kvöldsins en eins og gerist með góða brandara, það þarf að segja þá, ekki skrifa og verður því ekki reynt að endursegja hann hér,

Kolgríma, köttur húsfreyjunnar, var ekkert sérstaklega upprifin yfir þessum gestafans og var eldsnögg að skjótast út, þegar mér varð á að opna svaladyrnar. Sem betur fer, kom hún aftur til baka innan skamms. Anna Guðný og hún áttu svo í einuverjum stimpingum, sem ég kann ekki að skýra nánar en talið var að þær þyrftu báðar á einhvers konar sálgæslu að halda eftir þau samskipti.

Ég er viss um að Kolgríma á eftir að hafa illan bifur á okkur í framtíðinni.

Bestu þakkir fyrir góða kvöldstund !

Tóta

Þátttakan virðist ætla að verða góð !

Svo virðist sem áhugi fyrir lúðukvöldinu hjá Rannveigu sé allnokkur þrátt fyrir efasemdir varðandi veitingarnar.  En auðvitað er þetta rétt hjá Nínu: Ef hráefnið er nógu gott handa Kolgrímu er það nógu gott handa okkur. 

Ef þið munið eftir fleiri konum sem ekki eru á póstlistanum og uppfylla skilyrðin um tengsl við Vallahrepp, endilega látið þessi boð út ganga.  Það er nóg pláss hjá Rannveigu ! 

 

Fiskisúpa hvað... ??

Ég lá andvaka í nótt og velti fyrir mér erfiðu vandamáli. 
Eins og fram hefur komið ætlar Rannveig að bjóða til súpu á laugardaginn - fiskisúpu, talaði hún um.  Í gær rakst ég á hana í Samkaup/Kaupfélaginu.  Það eina sem hún hafði keypt voru fjögur mismunandi bréf af kattamat, laxabragð, humarbragð, grænmetis- og rækjublanda og svo eitthvað eitt enn sem ég man ekki hvað var.  Það sem hélt svo fyrir mér vöku var að þarna hafi hún kannski verið að ná sér í efnivið í fiskisúpuna.  Hún á að vísu kött, en kommon, fjögur bréf handa Kolgrímu einni !! 

Ég sofnaði ekki í nótt fyrr en ég leysti málið fyrir mig:  Tek með mér grænmeti og brauð og segist vera á sérstökum kúr !

Kveðja Tóta

Lúðukvöld hjá Rannveigu !

Minni á áður auglýstan fund hjá Rannveigu nk. laugardagskvöld.  Henni þætti ekki verra að vita svona nokkurn veginn hvað margar koma.  Þið getið skráð ykkur hér í athugasemdirnar, sent mér eða Rannveigu póst, nú eða bara hringt. 

Vonum að sem flestar sjái sér fært að mæta.

Tóta